Mun Silja Bára heimta karlalaust stjórnlagaþing?

Götudómstólnum barst áminning um framkomu Silju Báru Ómarsdóttur í síðasta prófkjöri Vinstri grænna fyrir borgarstjórnarkosningar í Reykjavík.

Silja Bára Ómarsdóttir

“…en hún stundaði það að dreifa kosningaseðlum til nemenda sinna [Innskot Ritstjórnar: Silja Bára er kennari við stjórnmálafræðideild Háskóla Íslands], hringja í þá og hvetja til að kjósa Sóleyju Tómasdóttur.  Ofan á það bað hún flesta sem hún hringdi í að kjósa eingöngu konur í forvalinu, til að enginn karl kæmist nógu ofarlega á lista hjá VG.”

Mistök dómstólsins: Máni Atlason hefur ekki gefið kost á sér

Í fyrri færslu, http://gotudomstollinn.wordpress.com/2010/10/19/ungliðarnir-ætla-ser-inn, sagði Götudómstóllinn frá því að ungi sjálfstæðismaðurinn Máni Atlason væri í framboði til stjórnlagaþings.

Hann hefur haft samband við Götudómstólinn og sagt dómstólnum að um misskilning sé að ræða þar sem hann “gæfi ekki kost á sér, hafi aldrei ætlað að gefa kost á sér og muni ekki gefa kost á sér til stjórnlagaþings”.

Götudómstóllinn biðst afsökunar á þessu.

Kristbjörg Þórisdóttir gefur kost á sér

Framsóknarkonan Kristbjörg Þórisdóttir sendi Götudómstólnum tilkynningu um framboð sitt til stjórnlagaþings.

Kristbjörg Þórisdóttir

Hún er útskrifuð með BA í sálfræði og hefur lokið kandídatsnámi í fötlunarfræðum.  Einnig er hún sem stendur í kandídatsnámi í sálfræði og stefnir á námslok 2010.

Hún er varamaður í stjórn landssambands Framsóknarkvenna 2009-2011 og hefur setið í miðstjórn flokksins frá 2006. Auk þess hefur hún setið í nefndum og ráðum fyrir flokkinn.

Verði Kristbjörg kjörin mun hún leggja áherslu á mannréttindi, lýðræði, sjálfsákvörðunarrétt þjóðarinnar og þjóðareign á auðlindum.  Henni finnst mikilvægt að skerpa á þrískiptingu ríkisvaldsins og að efla Alþingi og helstu stofnanir þess.

Ungliðarnir ætla sér inn

Þónokkuð er um að einstaklingar sem hafa verið áberandi í ungliðapólitík Íslands síðastliðin ár gefi kost á sér til setu á stjórnlagaþingi.  Má þar á meðal nefna ungu sjálfstæðismennina Pawel Bartoszek, Vilhjálm Andra Kjartansson, Svein Ágúst Kristinsson og Mána Atlason (Innskot Ritstjórnar: Þess má til gamans geta að Máni Atlason er bróðir Vífils Atlasonar sem hringdi í Hvíta Húsið fyrir nokkrum árum eins og frægt er orðið: http://www.visir.is/heimsfraegur-a-islandi-eftir-simtal-i-hvita-husid/article/200771206064)

Einnig eru þónokkrir ungir vinstrimenn í framboði en ber þar helst að nefna Bergvin Oddsson sem hefur verið virkur í starfi Ungra jafnaðarmanna og Viktor Orra Valgarðsson sem hefur látið til sín taka í Háskóla Íslands í stúdentapólitíkinni undir merkjum Skrökvu.  Svo má einnig nefna hinn unga vinstri-græna Guttorm Þorsteinsson.

Áhugavert verður að fylgjast með framgöngu þessara einstaklinga og eins hvort að ungliðarnir verði ekki fleiri á listanum þegar kjörstjórn gerir hann opinberan.

Ert þú í framboði?

Ert þú í framboði eða þekkir einhvern sem er í framboði?

Götudómstóllinn ætlar að taka saman lista yfir þá sem eru í framboði, til þess að við höfum öll sem besta yfirsýn yfir hverjir eru í framboði þangað til að kjörstjórn birtir sinn lista en það gæti liðið allt fram að 3. nóvember þangað til að það gerist.

Hjálpaðu dómstólnum með því að senda inn nafn þitt ef þú ert í framboði eða þekkir einhvern í framboði. Tengill á vefsíðu framb0ðsins væri einnig vel þeginn.

Velkomin á götudómstólinn

Stjórnlagaþing er í vændum, þess vegna þurfum við sem almenningur upplýsingar. Kjörstjórn hefur tilkynnt að rúmlega 500 framboð hafi borist á stjórnlagaþingið.

Hverjir eru þetta? Fjölmiðlar munu ekki geta fjallað vandlega um alla frambjóðendur en þar tekur Götudómstóllinn við. Götudómstóllinn ætlar sér að fjalla um frambjóðendur til stjórnlagaþings, kosti þeirra og galla, óháð flokkadráttum og hagsmunahópum. Enda er Götudómstóllinn frjáls og engum háður.  Nafnleysi Götudómstólsins hjálpar til við að halda dómstólnum frjálsum og óháðum.

Það verður að tryggja að þekktir einstaklingar í framboði fái ekki meira vægi í umfjöllun fjölmiðla en aðrir sem bjóða sig fram!

Götudómstóllinn er dómstóll fólksins og eru lesendur síðunnar beðnir um að taka þátt við efnisöflun enda er ansi mikið verk að fjalla um ríflega 500 frambjóðendur. Ef þið hafið einhverjar upplýsingar um frambjóðendur þá er ykkur skylt sem þegnar þessa lands að senda Götudómstólnum þessar upplýsingar. Þið getið sent dómstólnum upplýsingar á netfangið gotudomstollinn@gmail.com. Götudómstóllinn heitir fullkominni nafnleynd en ef lesendur vilja gjörtryggja nafnleysi sitt þá er hægt að nota þjónustur á netinu til þess (http://anonymouse.org/anonemail.html).

Kjörstjórn hefur ekki gefið út lista yfir frambjóðendur en hefur lofað að birta hann fyrir 3. nóvember. Dómstóllinn bíður spenntur eftir því að þessi listi verði birtur. Þangað til mun dómstóllinn grafast fyrir um hverjir eru í framboði og reyna eftir fremsta megni að fjalla um þá.

Að fjalla um jafn marga og eru í framboði er gífurlega mikið verk og eins og gefur að skilja mun dómstóllinn aldrei komast yfir það án ykkar hjálpar, lesendur góðir. Því er rétt að ítreka að þið verðið að hjálpa til, lesendur góðir. Það eruð þið sem þurfið að taka ákvörðun 27. nóvember, framtíð landsins er í húfi!